عظیم اور دائمی رحمتوں والے خدا کے نام سے

اے وہ کہ جب بندہ اس سے مانگے تو اسے دیتا ہے

اور جب وہ کسی چیز کی امید رکھے تو اس کی آرزو پوری کرتا ہے

جب وہ اس کی طرف بڑھے تو اسے قریب کر لیتا ہے

جب وہ کھلم کھلا نافرمانی کرے تو اس کے گناہ پر پردہ ڈالتا اور چھپا لیتا ہے

اور جب وہ اس پر بھروسہ کرے تو اس کی ضرورت پوری کرتا ہے

میرے معبود کون ہے جو تیری بارگاہ میں مہمانی کا طالب ہو تو تو اس کی مہمانی نہ کرے؟

کون ہے جو بخشش کی آس لے کر تیرے دروازے پر آئے تو تو اس پر احسان نہ کرے ؟

کیا یہ مناسب ہے کہ میں تیرے دروازے سے مایوسی کے ساتھ پلٹ جاؤں

جبکہ میں تیرے سوا کوئی مولا نہیں پاتا جو احسان و کرم کرنے والا ہو

پھر کیوں تیرے سوا کسی سے امید رکھوں جب کہ ہر بھلائی تیرے ہاتھ میں ہے

اور کیوں تیرے سوا کسی سے آرزو کروں جب کہ تو ہی خلق و امر کا مالک ہے

آیا تجھ سے امید توڑلوں جبکہ تو مجھے بن مانگے ہی اپنے کرم سے ہر چیز عطا فرماتا ہے

تو کیا تو مجھ جیسے شخص کو کسی کا محتاج کرے گا جب کہ میں تیرا دامن پکڑے ہوئے ہوں۔

وہ جس نے اپنی رحمت سے قصد کرنے والوں کو بھلائی عطا کی

اور جو معافی مانگنے والوں کو اپنے انتقام سے تنگی نہیں دیتا

کیسے تجھے بھول سکتا ہوں جب کہ تیرے ذکر میں لگا رہتا ہوں

کیسے تجھ سے غافل رہ سکتا ہوں جبکہ تو میرا نگہبان ہے

میرے معبود میں نے اپنے ہاتھ سے تیرے دامن کرم کو پکڑ لیا ہوا ہے

اور تیری عطاؤں کی آرزو کیے ہوئے ہوں

پس مجھے اپنی توحید کے سچے پرستاروں میں شامل کر لے

اور مجھے اپنے چنے ہوئے بندوں میں سے قرار دے

اے وہ کہ ہر بھاگ کر آنے والا جس کی پناہ لیتا ہے

اور ہر سائل جس سے امید رکھتا ہے

اے بہترین امید بر لانے والے، اے بہترین پکارے جانے والے

اے وہ جو سائل کو نہیں ہٹکاتا اور وہ آرزومند کو مایوس نہیں کرتا

اے وہ جس کا دروازہ پکارنے والے کے لیے کھلا ہے اور امیدوار کے لیے پردہ اٹھا ہوا ہے

بواسطہ تیرے کرم کے سوال کرتا ہوں کہ مجھ پر اپنی عطا سے ایسا احسان فرما جس سے میری آنکھیں ٹھنڈی ہو جائیں

اور ایسی امید میں دے کہ جس سے میرے دل کو چین آ جائے

ایسا یقین عطا کر کہ جس سے دنیا کی مصیبتیں میرے لیے ہلکی ہو جائیں

اور میری سمجھ بوجھ پر سے نادانی کے پردے دور ہو جائیں

تیری رحمت کے واسطے سے اے سب سے زیادہ رحم کرنے والے