مفاتیح النجاح میں سورۂ یاسین کے فضائل کے ضمن میں حضرت رسول اکرمؐ سے منقول ہے کہ جو شخص خدا کی خوشنودی کیلئے سورۂ یٰس پڑھے تو خدا اس کے گناہ معاف کر دے گا اور اسے بارہ مرتبہ قرآن کو ختم کرنے ثواب عطا فرمائے گا۔ نیز جب یہ سورہ کسی مریض کے پاس تلاوت کیا جائے تو اس کے سامنے ہر حرف کے بدلے میں دس فرشتے صف بستہ ہو کر نازل ہوتے ہیں جو اس کیلئے مغفرت طلب کرتے ہیں اور اس کی روح قبض ہونے تک حاضر رہتے ہیں، اس کے جنازے کے ساتھ چلتے ہیں، اس پر نماز پڑھتے ہیں اور اس کے دفن میں شریک ہوتے ہیں۔ اگر کوئی مریض وقت نزع خود یا کوئی دوسرا شخص اس کے پاس سورۂ یٰس کی تلاوت کرے تو رضوانِ جنت بہشت کے پانی کا ایک کاسہ لا کر اسے دیتا ہے جسے وہ پیتا ہے اور سیراب ہو کر اس دنیا سے رخصت ہوتا ہے، اور اپنی قبر سے سیراب ہی اٹھے گا اور نبیوں کے کسی حوض کا محتاج نہ ہو گا، حتیٰ کہ وہ سیراب ہو کر جنت میں داخل ہو گا۔ نیز منقول ہے کہ سورۂ یٰس اپنے پڑھنے والے کو دنیا اور آخرت کی بھلائی عنایت کرے گا، قیامت کی ہولناکی اور دنیا کی بلاؤں سے بچائے گا، نیز ہر شر کو اس سے دور کرے گا اور اس کی ہر حاجت بر لائے گا۔ سورۂ یٰس پڑھنے والے کے لیے بیس حج کا ثواب ہے اور اسے سننے والے کے لیے ہزار نور، ہزار رحمتیں اور ہزار برکتیں ہوں گی اور یہ سورہ اس کو ہر مصیبت سے نجات دلائے گا۔ حضورؐ سے مروی ہے کہ جو شخص قبرستان میں سورۂ یٰس کی تلاوت کرے تو خدا وہاں مدفون لوگوں کے عذاب میں کمی کرے گا اور اس کو مُردوں کی تعداد کے برابر نیکیاں عطا فرمائے گا۔ امام جعفر صادقؑ سے منقول ہے کہ جو شخص دن میں سورۂ یٰس پڑھے وہ رات تک محفوظ رہے گا اور روزی سے نوازا جائے گا اور جو شخص رات کو سونے سے پہلے یہ سورہ پڑھے تو خدا اس کو ہر آفت اور شیطان کے ہر شر سے بچانے کیلئے اس پر ہزار فرشتے مقرر کرے گا، اور اگر وہ اسی روز مر جائے تو خدا اس کو جنت میں داخل فرمائے گا۔