یہ معظمہ جو امام موسیٰ کاظم علیہ السلام کی دختر اور امام رضا علیہ السلام کی خواہر ہیں۔ ایران کے شہر قم میں دفن ہیں جہاں ان کا بہت بہترین سنہری گنبد اور ضریح ہے اور وسیع و عریض صحن بھی بنایا گیا ہے۔ وہاں بہت زیادہ خدام ہیں اور وافر مقدار میں اموال و جائیداد اس روضۂ مبارک کیلئے وقف کیے گئے ہیں۔ یہ بارگاہ دنیا بھر کے وابستگان اہل بیتؑ اور خصوصاً اہل قم کیلئے پناہ گاہ ہے۔ چنانچہ دوران سال لوگ دور دور سے اس بی بی کی زیارت سے مستفید ہونے اور ان سے فیض و برکت حاصل کرنے آتے ہیں۔

احادیث و اخبار سے معصومۂ قم کی زیارت کی بہت زیادہ فضلیت ظاہر ہوتی ہے۔ چنانچہ شیخ صدوق نے سند حسن کے ساتھ جو صحیح کے برابر ہے، سعد بن سعد سے روایت کی ہے کہ امام علی رضا علیہ السلام سے جناب فاطمہؑ بنت امام موسیٰ کاظمؑ کی زیارت کے بارے میں پوچھا گیا تو آپؑ نے فرمایا: جو شخص ان معصومہؑ کی زیارت کرنے آئے تو جنت اس کیلئے واجب ہو گی۔ معتبر سند کے ساتھ امام محمد تقیؑ سے مروی ہے کہ آپؑ نے فرمایا جو شخص قم میں میری پھوپھی جناب فاطمہؑ کی زیارت کرے وہ جنت کا حق دار ہے۔

علامہ مجلسی نے بعض کتب زیارت میں علی بن ابراہیم سے اور انہوں نے اپنے والد گرامی سے اور انہوں نے سعد اشعری قمی سے اور انہوں نے امام رضا علیہ السلام سے روایت کی ہے کہ آپ نے فرمایا: اے سعد تمہارے قرب میں ہماری ایک قبر ہے۔ میں نے عرض کی آپ پر قربان ہو جاؤں کیا آپ جناب فاطمہؑ بنت موسیٰ کاظمؑ کی قبر کے بارے میں فرما رہے ہیں؟ آپ نے فرمایا کہ ہاں، جو شخص ان کے حق کو پہچانتے ہوئے ان کی زیارت کرے تو جنت اس کیلئے واجب ہو گی۔ جب تم ان کی قبر پر جاؤ تو سرہانے کی طرف قبلہ رخ کھڑے ہو کر ۳۴ مرتبہ اَللهُ اَكْبَرُ ۳۳ مرتبہ سُبْحَانَ للّٰهِ اور ۳۳ مرتبہ اَلْحَمْدُ ﷲِ کہو اور پھر یہ زیارت پڑھو: