ان امام زادگان میں سے دوسرے بزرگ شہزادہ عبد العظیم ہیں کہ ان کا سلسلۂ نسب چار واسطوں سے امام حسن علیہ السلام تک پہنچتا ہے، یعنی عبد العظیم بن عبد اللہ بن علی بن الحسن بن زید بن الحسنؑ بن علیؑ ابن ابی طالبؑ۔ آپ کی قبر شریف تہران کے محلہ رے میں مشہور و معروف ہے ﴿اور آج کل اس محلہ کو شاہ عبد العظیم کے نام سے پکارا جاتا ہے اور تہران سے وہاں تک بسیں آتی جاتی ہیں﴾۔ آپ کا روضۂ مبارک عوام و خواص کی زیارت گاہ اور جائے پناہ ہے۔

آپ کے مقام کی بلندی اور مرتبے کی بڑائی محتاج بیان نہیں، کیونکہ آپ خاندان نبوت کے فرد ہونے کے علاوہ عظیم محدثین اور اجل علماء میں سے ہیں۔ آپ بڑے عابد و زاہد اور بہت متقی و پرہیزگار تھے، اور امام محمد تقیؑ اور امام نقیؑ کے خاص صحابہ میں سے تھے۔ آپ کو ان ہر دو ائمہؑ کے حضور خصوصی تعلق و توسل حاصل تھا۔ یہی وجہ ہے کہ شاہ عبد العظیم نے ان دونوں معصومینؑ سے بہت سی احادیث روایت کی ہیں۔ یہی بزرگ ”خطب امیر المؤمنین علیہ السلام“ کے نام سے مشہور کتاب کے مؤلف ہیں۔ نیز آپ نے ”یوم ولیلہ“ نامی کتاب میں اپنے عقائد درج فرمائے اور یہ کتاب امام علی نقی علیہ السلام کی خدمت میں پیش کی تھی۔ چنانچہ امامؑ نے اس کتاب کی تصدیق کرتے ہوئے فرمایا کہ اے ابا القاسم، خدا کی قسم یہی وہ دین ہے جو خدائے تعالیٰ نے اپنے بندوں کیلئے پسند کیا ہے، پس خداوند جہاں تمہیں دنیا و آخرت میں اس عقیدہ و دین پر قائم رکھے۔

صاحب بن عباد نے آپ کے حالات میں ایک مختصر رسالہ لکھا ہے جسے ہمارے استاد علامہ نوری مرحوم نے مستدرک الوسائل کے آخر میں نقل کر دیا ہے۔ اس رسالے اور رجال نجاشی میں یہ واقعہ منقول ہے کہ حضرت شاہ عبد العظیمؑ بادشاہ وقت کے خوف سے جلا وطن ہو کر شہر بہ شہر پھرتے اور اپنے آپ کو ایک قاصد ظاہر کرتے رہے، حتیٰ کہ آپ شہر رے پہنچے اور خود کو ساربانوں میں شامل کر کے پوشیدہ ہو رہے۔ لیکن بقول نجاشی، سکۃ الموالی کے بعض شیعوں کے سرداب میں رہا کرتے کہ رات کو عبادت کرتے اور دن میں روزہ رکھتے تھے۔ جب کبھی اس سرداب سے باہر آتے تو اس قبر کی زیارت کرتے تھے جو اب آپ کی قبر کے سامنے واقع ہے۔ آپ فرماتے تھے کہ یہ امام موسیٰ کاظمؑ کے ایک فرزند کی قبر ہے۔ شروع شروع میں تو آپ کو صرف چند ایک شیعہ بزرگ جانتے پہچانتے تھے، لیکن کچھ عرصہ کے بعد عام لوگوں نے بھی آپ کو پہچان لیا۔ انہی ایام میں ایک شیعہ بزرگ نے عالم خواب میں حضرت رسولؐ کو دیکھا کہ آپ فرما رہے ہیں کہ سکۃ الموالی سے جا کر میرے فرزند کو عبدالجبار کے باغ میں سیب کے درخت کے نیچے دفن کریں گے (اور یہ وہی جگہ ہے جہاں اب شاہ عبد العظیم مدفون ہیں)۔ یہ خواب دیکھ کر وہ شیعہ بزرگ اس باغ کے مالک کے پاس گئے تاکہ وہ باغ اور درخت خرید لیں۔ باغ کے مالک نے پوچھا کہ آپ کس لیے باغ خرید کرتے ہیں؟ انہوں نے اپنا خواب باغ کے مالک سے بیان کیا تو اس نے بھی اپنا ایسا ہی خواب سنایا اور کہا کہ میں نے یہ باغ ان سید پاک اور دیگر شیعہ مومنین کیلئے وقف کر دیا ہے کہ وہ اپنے متوفیوں کو یہاں دفن کیا کریں۔ پھر انہی ایام میں شاہ عبد العظیم بیمار پڑے اور کچھ دنوں بعد اللہ کو پیارے ہو گئے۔ جب غسل دینے کیلئے ان کا لباس اتارا گیا تو ان کی جیب میں سے ایک رقعہ نکلا، جس میں آپ نے اپنا نام و نسب لکھا ہوا تھا کہ میں ابو القاسم عبد العظیم ہوں، میں فرزند ہوں عبد اللہ کا، جو فرزند ہیں علی کے، اور وہ فرزند ہیں حسن کے، اور وہ فرزند ہیں زید کے، اور وہ امام حسنؑ کے فرزند ہیں۔

صاحب بن عباد نے شاہ عبد العظیم کے علم و فضل کے بارے میں ابو تراب رویانی کی روایت نقل کی ہے کہ انہوں نے کہا کہ میں نے ابو حماد رازی سے سنا کہ وہ کہہ رہے تھے میں سامرہ میں ایک روز امام علی نقی علیہ السلام کی خدمت میں پہنچا اور حلال و حرام سے متعلق بہت سے مسائل آپؑ سے دریافت کیے اور آپؑ نے ان کے جوابات ارشاد فرمائے۔ جب میں رخصت ہونے لگا تو آپ نے فرمایا کہ اے ابو حماد اگر اپنے شہر رے میں تمہیں کوئی مشکل مسئلہ پیش آئے تو جناب عبد العظیم بن عبد اللہ حسنی کے پاس جا کر پوچھ لینا اور ان کو میرا سلام بھی پہنچا دینا۔ محقق میر دامادؒ نے کتاب رواشح میں تحریر کیا ہے کہ شاہ عبد العظیم کی فضلیت میں بہت سی احادیث وارد ہوئی ہیں، اور ایک روایت میں یہ بھی آیا ہے کہ جو شخص ان کی زیارت کو جائے جنت اس کیلئے واجب ہے۔ شیخ شہید ثانیؒ نے حاشیہ میں بعض نسابین کے حوالے سے اسی روایت کا خلاصہ نقل کیا ہے. ابن بابویہؒ اور ابن قولویہ نے معتبر سند کے ساتھ روایت کی ہے کہ شہر رے کا ایک شخص امام علی نقی علیہ السلام کی خدمت میں آیا تو حضرت نے پوچھا کہ تم کہاں تھے؟ اس نے عرض کی کہ میں امام حسین علیہ السلام کی زیارت کرنے گیا ہوا تھا۔ آپ نے فرمایا کہ تم اپنے شہر میں سید عبد العظیم کی قبر کی زیارت کرتے تو اس شخص کی مانند ہوتے جس نے امام حسین علیہ السلام کی زیارت کی ہو۔

مؤلف کہتے ہیں علمائے کرام نے شاہ عبد العظیم کیلئے کوئی مخصوص زیارت نقل نہیں کی، تاہم فخر المحققین آقا جمال الدینؒ نے اپنی کتاب مزار میں فرمایا ہے کہ ان کی زیارت یوں پڑھنا چاہیے: