مشہور روایت کے مطابق 24 ذی الحجہ عید مباہلہ کا دن ہے۔ اس دن حضرت رسولؐ نے نصارائے نجران سے مباہلہ کیا تھا۔ واقعہ یوں ہے کہ حضرت رسولؐ نے اپنی عبا اوڑھی، پھر امیر المؤمنینؑ، جناب فاطمہؑ اور حضرت حسنؑ و حسینؑ کو اپنی عبا میں لے لیا۔ تب فرمایا کہ یا اللہ! ہر نبی کے اہلبیت ہوتے ہیں اور یہ میرے اہلبیت ہیں۔ پس ان سے ہر قسم کی ظاہری و باطنی برائی کو دور رکھ اور ان کو اس طرح پاک رکھ جیسے پاک رکھنے کا حق ہے۔ اس وقت جبرائیل امینؑ آیتِ تطہیر لے کر نازل ہوئے۔ اس کے بعد حضرت رسولؐ خدا نے ان چار ہستیوں کو اپنے ساتھ لیا اور مباہلہ کے لئے نکلے۔ نصاریٰ نجران نے آپ کو اس شان سے آتے دیکھا، اور علامات عذاب کا مشاہدہ کیا تو مباہلہ سے دست بردار ہو کر مصالحت کر لی اور جزیہ دینے پر آمادہ ہو گئے۔

آج ہی کے دن امیر المؤمنینؑ نے حالت نماز میں سائل کو انگوٹھی عطا فرمائی، اور آپ کی شان میں اللہ نے آیۂ مبارکہ اِنَّمَاْ وَلَیُّكُمُ ﷲِ ... نازل فرمائی۔

خلاصۂ کلام یہ کہ یوم مباہلہ بڑی عظمت اور اہمیت کا حامل ہے اور اس میں چند ایک اعمال ہیں۔

﴿۱﴾ غسل

﴿۲﴾ روزہ

﴿۳﴾ دو رکعت نماز کہ جس کا وقت، ترتیب اور ثواب عید غدیر کی نماز کی مثل ہے، البتہ اس میں آیۃ الکرسی کو ھُمْ فِیْھَا خَالِدُوْنَ تک پڑھے۔

﴿۴﴾ دعائے مباہلہ: یہ ماہ رمضان کی دعائے سحر کے مشابہ ہے اور اس کو شیخ و سید دونوں نے نقل فرمایا ہے۔ چونکہ ان دونوں بزرگوں کے نقل کردہ کلمات دعا میں کچھ اختلاف ہے، لہٰذا یہاں ہم اسے شیخ کی کتاب مصباح کی روایت کے مطابق تحریر کر رہے ہیں۔ شیخ کا کہنا ہے کہ امام جعفر صادقؑ نے دعائے مباہلہ کی بہت زیادہ فضیلت بیان فرمائی ہے اور وہ دعا یہ ہے:

﴿۵﴾ دو رکعت نماز اور ستر مرتبہ استغفار کے بعد شیخ و سید کی نقل کردہ وہ دعا پڑھے جس کا آغاز الحمد للہ رب العالمین سے ہوتا ہے۔

ہر مومن اور مومنہ حضرت امیرؑ کی پیروی کرتے ہوئے صدقہ و خیرات کرے۔

نیز حضرتؑ کی زیارت پڑھے اور اس روز زیارت جامعہ کا پڑھنا زیادہ مناسب ہے۔