وا ضح رہے کہ روز جمعہ کئی مناسبتوں سے امام العصر ﴿عج﴾ کے ساتھ تعلق رکھتا ہے ، اولاً یہ کہ حضرت کی ولادت باسعادت اسی روز ہوئی۔ ثانیاً یہ کہ آپ کا ظہور پرنور بھی اسی دن ہو گا۔ ثالثاً یہ کہ دیگر ایام کی نسبت اس دن حضرتؑ کا انتظارِ ظہور زیادہ ہے۔ جمعہ کے روز حضرت کی زیارت خاصہ بعد میں ذکر کی جائے گی،جس کے چند جملے یہ ہیں ھٰذَا یَوْمُ الْجُمُعَۃِ وَھُوَ یَوْمُكَ الْمُتَوَقَّعُ فِیْہِ ظُھُوْرُكَ وَالْفَرَجُ فِیْہِ لِلْمُؤْمِنِیْنَ عَلٰی یَدَیْكَ (یہ روز جمعہ ہے اور یہ وہی دن ہے جس میں آپ کے ظہور کی تو قع ہے اور جس میں آپ کے ہاتھوں مومنوں کو آسودگی ہو گی)۔ بلکہ جمعہ کے روز کے عید قرار پانے اور چار عیدوں میں شمار ہو نے کی بڑی وجہ یہی ہے کہ اس روز امام العصر﴿عج﴾ زمین کو کفر و شرک کی آلودگی، گناہوں کی کثافت اور جابروں ، منکروں اور منافقوں کے وجود سے پاک کریں گے اور اعلائے کلمۂ حق اور اظہار دین و شریعت کے باعث مومنین کے دل اس دن روشن و منور اور مسرور ہوں گے، وَاَشْرَقَتِ الْاَرْضَ بِنُوْرِ رَبِّھَا (اور زمین اپنے پروردگار کے نور سے چمک اٹھے گی)۔

بہتر ہے کہ اس دن صلوات کبیر اور صا حب الامرؑ ﴿عج﴾ کیلئے امام علی رضاؑ کی فرمودہ یہ دعا پڑھیں: اَللّٰھُمَّ ادْفَعْ عَنْ وَلِیِّكَ وَخَلِیْفَتِكَ ... تا آخر۔ یہ دعا اعمال سرداب میں ذکر کی جائے گی۔

مکمل دعا باب زیارات میں ملاحظہ کریں

قائم آل محمدؑ کے زمانۂ غیبت میں وہ دعا پڑھیں جو شیخ ابو عمرو عمروی نے ابو علی ابن ہمام کو لکھوائی تھی چونکہ صلوات کبیر اور یہ دعا دونوں بہت طولانی ہیں لہذا اس مختصر کتاب میں ان کی گنجائش نہیں ہے۔ پس شائقین اس سلسلے میں مصباح المتہجد اور جمال الاسبوع کی طرف رجوع کریں۔ البتہ مناسب ہے کہ ہم یہاں ابالحسن ضراب اصفہانی کی طرف منسوب صلوات کا ذکر کریں جسے شیخ و سید نے عصرِ جمعہ کے اعمال میں نقل فرمایا ہے۔ سید فرماتے ہیں کہ یہ صلوات امام زمانہ ﴿عج﴾ سے مروی ہے اگر روز جمعہ کسی عذر کے باعث عصرِ جمعہ کی دیگر تعقیبات نہ پڑھ سکیں تو بھی اس صلوات کا پڑھنا ہر گز ہر گز ترک نہ کریں اس خصوصیت کی وجہ سے کہ جس سے خدا نے ہمیں مطلع کیا ہے۔ پھر انہوں نے صلوات کے ساتھ اس کی سند بھی نقل کی ہے لیکن مصباح میں شیخ نے فرمایا ہے کہ یہ صلوٰۃ حضرت امام زمانہ ﴿عج﴾ سے مروی ہے کہ جسے آپ نے ابوالحسن ضراب اصفہانی کو مکہ میں تعلیم فرمائی تھی اور ہم نے اختصار کے پیش نظر اس کی سند کو ذکر نہیں کیا۔ اور وہ صلوات یہ ہے