عظیم اور دائمی رحمتوں والے خدا کے نام سے

حمد اس خدا کے لیے ہے جس نے اپنی قدرت سے تاریک رات کو ختم کیا

اور روشن دن کو اپنی رحمت سے وجود بخشا

اور مجھ پر بھی روشنی بکھیری اور میں اس کی نعمت سے مستفید ہوتا ہوں۔

اے معبود! جس طرح تو نے مجھے آج کے دن زندہ رکھا اسی طرح آئندہ بھی زندہ رکھ

اور اپنے نبی محمدؐ اور ان کی آلؑ پر رحمت فرما

اور مجھے آج اور دیگر راتوں اور دنوں میں داغدار نہ بنا

حرام کام کرنے اور گناہ کمانے سے

آج کے دن میں جو بھلائی ہے اور بعد میں آنے والے انہی دنوں میں جو بھلائی ہے، عطا فرما۔

اور مجھے اس دن کے شر سے، جو کچھ اس میں ہے اس کے شر اور اس کے بعد بھی شر سے بچا

اے معبود! میں اسلام کے ذریعے سے تیری طرف وسیلہ پکڑتا ہوں

اور قرآن کے احترام کے ساتھ تجھ پر بھروسہ کرتا ہوں

اور محمد مصطفٰیؐ کو تیرے حضور اپنا شفیع بناتا ہوں

پس اے معبود! جس ضمانت کے ساتھ میں اپنی حاجت برآوری کا امیدوار ہوں اس پر توجہ فرما

اے سب سے زیادہ رحم کرنے والے

اے معبود! اس جمعرات میں میری پانچ حاجات پوری فرما

کہ سوائے تیرے کرم کے کوئی اس کی گنجائش نہیں رکھتا

اور سوائے تیری نعمتوں کے کوئی اس کی طاقت نہیں رکھتا

ایسی صحت وسلامتی عطا فرما جس کے ذریعے تیری اطاعت پر قوت حاصل ہو

ایسی عبادت کی توفیق دے جس سے میں تیرے عظیم ثواب کا حق دار بن جاؤں

رزق حلال سے میری حالت میں کشادگی فرما

خوف و خطرے کے مواقع پر اپنے امان کے ذریعے محفوظ فرما

غم و آلام کے ہجوم میں مجھے اپنی پناہ میں رکھ

اور محمدؐ وآل محمدؑ پر رحمت فرما

اور ان میں سے میرے لیے توسل کو روز قیامت نفع دینے والا شفیع بنا

کہ تو سب سے زیادہ رحم کرنے والا ہے